Ferðalagið

Ferðin um hálendið er hluti af töfrum Kerlingarfjalla. Þögnin sem einkennir grýttar auðnir hálendisins er engu lík og hún fær ferðalanga til að staldra við og leggja við hlustir.

Staðsetningin

Highland Base er staðsett í Kerlingarfjöllum, í 700 metra hæð á miðju hálendi Íslands. Á sumrin er hægt að aka þangað á fólksbílum eða taka rútu. Á veturna er aðeins hægt að komast þangað á sérútbúnum fjallabílum undir stjórn fagfólks.

Vegalengdin

Frá Reykjavík til Kerlingarfjalla eru um 200 kílómetrar og leiðin tekur um 3 ½ klukkustund í akstri – undir eðlilegum kringumstæðum. Hafa ber í huga að aðstæður á hálendi Íslands geta tekið breytingum frá degi til dags.

Ófyrirsjáanlegar aðstæður, óviðjafnanlegt umhverfi og krefjandi veður setja sinn svip á hálendisferðir yfir veturinn. Búðu þig undir ögrandi ferð á illfærum vegi í ógleymanlegu ferðalagi uppi á öræfum.

Á eigin vegum:

Vegirnir á hálendinu eru ekki ruddir á veturna og er þá aðeins fært í Kerlingarfjöll á sérútbúnum fjallajeppum. Þeir sem hafa aðgang að slíkum farartækjum og treysta sér til ferðarinnar geta heimsótt okkur á eigin vegum. Hér eru upplýsingar um leiðina og aðkomuna.

Við ítrekum við bílstjóra að vanda undirbúning, vera við öllu búnir og huga að færð og veðri áður en lagt er af stað — og jafnvel hætta við ferðina ef fyrirséð er að aðstæður verði sérstaklega erfiðar.

Skipulagðar ferðir:

Samstarfsaðilar okkar hafa milligöngu um flutning til og frá Kerlingarfjöllum. Hjá þeim starfa atvinnubílstjórar með reynslu af akstri á sérútbúnum farartækjum í krefjandi aðstæðum.